مين ما يحبّش Siri؟

السلام عليكم ورحمة الله وبركاته،

نظام تشغيل الاوامر الصوتية بتاع آبل، Siri (سيري)، كان من اقوى الخصائص اللي نزلوه في آخر آيفون (iPhone 4S). من زمان موضوع الاوامر الصوتية موجود في عدة انظمة، ولكن دقة سيري وسهولة استخدامها كان سبب ان كل الناس حبوها، وشركة آبل عندها خطط كبيرة لسيري، زي ما اتكلمنا في موضوع التلفزيون اللي آبل بتصممه حاليا.

ولكن واضح ان حب سيري مادخلش كل قلوب، وبالأخص قلب IBM، قلبهم أزرق ومابيرحمش :)

اعلن رئيس تقنية المعلومات في شركة IBM انهم قررو منع اي موظف في الشركة من استخدام سيري. طب ليه يا جماعة؟ عملت ايه البنت عشان كل ده؟

قال لك ان كل الكلام اللي بتقوله لسيري بيتخزن في سيرفرات عند آبل، وبيترجم لكلام مكتوب وبيتخزن في سيرفراتهم. طب سو وات؟ قال لك ان ممكن الموظفين يقولو كلام سرْي للغاية لسيري تقوم آبل تعرف اسرار عن شركة IBM وده غير مقبول. مع العلم ان IBM عندهم ٤٠٠،٠٠٠ موظف.

الغريب ان مفيش اي شركة في العالم فكرت في سيناريو متطرف بالشكل ده. يعني وزارات الدفاع والجيش والشرطة محدش عنده مشاكل مع سيري! وبعدين فين المشكلة؟ ما هي جوجل بتلم بيانات الله ينور على كل المستخدمين لخدماتها، اشمعنى سيري يعني.

- منسي


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044