جوجل كروم وحاجتين تانيين [منوعات]

السلام عليكم ورحمة الله وبركاته،

الانترنت اكسبلورر (Internet Explorer) كان دايما اكتر متصفح بيستخدم في العالم كله. ونصيبه كان في فترة  من الفترات فوق ال٨٠٪. وسبب ده طبعا ان مايكروسوفت بترميه في كل نسخة ويندوز في العالم، و٩٠٪ من اجهزة العالم شغالة عالويندوز.

انا طول عمري بعتبر ان الاكسبلورر جريمة في حق الانترنت ولازم يعدم فورا. اول حاجة بعملها اني انزل متصفح تاني زي Firefox او Google Chrome.

وصراحة اكتر واحد بقيت احبه هو الكروم، لأنه خفيف ونضيف ومش مكلكلع زي الباقي، وفعلا اصبح هو اختياري الأول على اي جهاز ويندوز او ماك.

واضح ان ده مش رأي انا بس، لأن اخر احصائيات بتقول ان لأول مرة في التاريخ الجوجل كروم سبق الاكسبلورر عشان يبقى اكتر متصف مستخدم في العالم. انهاردة ٣١.٨٨٪ من التصفح عالانترنت بيتم على الكروم، و ٣١.٤٧٪ بيتم على الاكسبلورر.

ودي صورة توضح استخدام كل المتصفحات الموجودة حاليا:

لاحظ ان جوجل كروم (الخط الاخضر) نصيبه في ازدياد مستمر، بينما الاكسبلورر (الخط الازرق) نصيبه في انتحار مستمر. وده شيء بيسعدني جدا.

سامسونج جالاكسي س٣: الحق احجز واحد

لعشاق الجالاكسي (مش الشوكالاته) اللي مناموش ليلة من ساعة الاعلان عن التليفون الجديد من سامسونج، دلوقت ممكن تحجز واحد عن طريق امازون عشان اول ما ينزل عندهم يبعتولك وحدة.ممكن تختار اللون الابيض او الازرق، الازرق حيتشحن ابتداء من ٢٩ مايو، والابيض من ١ يونيو.

السعر غالي شوية، ٧٩٩ دولار. لكن انا متأكد ان فيه ناس مش حتكمل المقالة وراحت تشتريه :)

ولاية كاليفورنيا تفتح ذراعيها لسيارة المستقبل

فاكرين المقال اللي كتبته عن السيارة التوماتيكي؟ دي السيارة اللي بتمشي من غير سائق، انتاج جوجل. جوجل كانت اخذت تصريح فقط في ولاية نيفادا عشان يسمح استخدام السيارة في الولاية. ودلوقت كاليفورنيا انضمت للحفلة وبدأو يضعوا قوانين الأمان لسيارة المستقبل.

- منسي

 


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044