يا ترى شكلك ايه يا غزال؟

السلام عليكم ورحمة الله وبركاته،

الى عشاق الآيفون، عندي لكم خبر حيفرحكم. ولعشاق الاندرويد والحاجات “التانية”، عندي لكم خبر يفرسكم :)

طبعا زي منتو عارفين، الاشاعات بدأت تكتر عن الآيفون الجديد. وبما ان شركة آبل متبنية سياسة سكتم بكتم كالعادة، الاشاعات بتزيد والكل بياخد راحته.

يمكن اكبر سؤال الناس نفسها تلاقيلو جواب هو: الآيفون الجديد حيكون شكله عامل ازاي؟

الكل عارف ومتأكد ان آبل لازم تغير الشكل لآنهم مستخدمين الشكل الحالي بقالهم سنتين (iPhone 4 و iPhone 4S)، وبقية المنافسين طورو منتجاتهم بشكل كبير ينافس تصميم الآيفون الحالي, وآبل لعبتها التصميم واشتهرت بتصميماتها العبقرية في كل حاجة عملتها، فلا يمكن ينزلو الآيفون الجديد بنفس الشكل للمرة التالتة.

في اشاعات كتير طلعت عن التغيرات اللي حتعملها آبل في الآيفون الجديد، معظمها عن التقنية الجديدة في التليفون (خدمات زي LTE و NFC) و لكن بعضها اتكلم عن الشكل الخارجي للتليفون، ومعظم الناس طبعا بتوع ” احب المظهر مليش في الجوهر” :)

الاسم

طبعا iPhone 5، اي حاجة تانية ملهاش معنى. ولكن يو نيفر نو (you never know).

الشاشة

يمكن اكبر اشاعة هي اللي بتتكلم عم حجم الشاشة، شاشة الآيفون (حجم ٣.٥ بوصة ) تعتبر صغيرة شوية مقارنة ببقية الموبايلات المنافسة، بالذات سامسونج اللي ما شاء الله عندهم اجهزة وصلت فوق ال٥ بوصة، مع اني مقتنع ان الموديلات دي مصنوعة للأفيال زي مكتبت قبل كده.

مصادر كتيرة بتؤكد ان الآيفون الجديد حتكون الشاشة بتاعته حجمها ٤ بوصة، وهو حجم حيكون مناسب جدا لأنه بيوفر مساحة اكبر من غير ما ما حجم التليفون يكبر بطريقة تضايق.

السؤال هو: طب رزم البرامج الموجودة دلوقت المصممة لشاشة حجمها ٣.٥ بوصة حيكون مصيرها ايه في الحالة دي؟

الحجم

الاشاعات بتقول ان حجم التليفون حيتغير كمان، حيكون اطول حوالي ١٠ مليمتر عن اخواته القدام، ولكن الاهم انه حيكون ارفع بحوالي ٢٠٪

الهيكل

يمكن تاني اكبر اشاعة بعد حجم الشاشة هي مادة صنع الهيكل بتاع التليفون.

آبل اشترت حقوق استخدام مادة في ٢٠١٠ اسمها LiquidMetal او “الحديد السائل”، المادة دي فعلا اسم على مسمى لانها عبارة عن تركيبة فريدة من معادن مختلفة بتطلع شكلها في الآخر زي متكون حديد سائل.

من زمان والاشاعات بتقول ان آبل حتستخدم المادة دي، ولكن كتر اليومين دول كلام بيؤكد انها حتستخدمها في صنع الآيفون الجديد.

امتى؟

معظم الاشاعات بتؤشر ان تاريخ اصدار الآيفون الجديد حيكون في شهر سبتمبر او اكتوبر في ٢٠١٢، وده متوافق مع تواريخ اصدار الآيفون في السنين الماضية.

كلام جميل، لكن ملوش طعم من غير صور. وده السبب اللي شجع مصمم ورسام فرنسي (بلد الفن بقى تقول ايه) انه ينتج الصور دي عشان نبطل زن :)

ايه رأيك في الصور دي؟

الى من يهمه الأمر، خدو فلوسي ارجوكو وادوني اللي في الصورة ده!

- منسي


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044