سوبرمان، وحادثة جوجل…وياهو؟ [منوعات]

السلام عليكم ورحمة الله وبركاته،

“وانت فاكر نفسك سوبرمان مثلا؟”

معظم الناس جوابها حيكون لأ، لكن بالنسبة للراجل اللي في الفيديو ده، اجابته حتكون نعم.

ولأول مرة في تاريخ البشرية يقدر انسان ينط من طيارة على ارتفاع ٢،٤٠٠ قدم ويهبط على الارض بسلام، ومن غير باراشوت!

الراجل (اللي عمره ٤٢ سنة) هبط على مدرج من صناديق الكارتون، ١٨،٦٠٠ صندوق!! المدرج احتاج ١٠٠ متطوع عشان يتبني، وكان طوله ٣٥٠ قدم، عرضه ٤٠ قدم، وارتقاعه ١٢ قدم. يعني اراجل كان عامل احتياطاته، وعمل لنفسه مرتبة كبيرة ومريحة ينزل عليها. مدة الطياران بتاعته كانت حوالي ٥٠ ثانية، تخيل شعوره كان عامل ازاي وهو نازل من السما، وتخيل شعور العصافير المسكينة لما شافت المنظر ده :) شوفو البدلة اللي صممها بنفسه واللي سمحت له يطير ويهبط من غير باراشوت:

سوبرمان

حادثة جوجل

عارفين برنامج Google Maps (خرائط جوجل)؟ كل ما بكون رايح مكان مش عارف هو فين، اول حاجة بعملها اني بدخل على خرائط جوجل وادور عليه واشوفه هو فين واوصل له ازاي.

في بلاد معينة ممكن تشوف فيها منظر الشوارع اكنك ماشي فيها بنفسك، وده عن طريق Street View، جوجل بتنزل سيارات بتاعتها في الشوارع بكاميرات مثبتة عليها تلقط صور للشوارع والمحيط بتاعها من وجهة نظر الناس الماشية. جوجل في الانترنت والموبايل والكمبيوتر والشارع، وقريبا في الحمام.

للأسف الخاصية دي مش موجودة في الدول العربية، لأن طبعا لازم جوجل تبعت السيارات المخصوصة دي، ولو السيارات دي وصلت مصر مش حترجع تاني، ولو نزلت الشوارع مش حتقدر تتحرك اصلا من كتر الزحمة، والصور اللي حتاخدها صور الناس وهما ماسكين في خناق بعض وفضايح تانية احنا في غنى عنها.

لكن واضح ان في واحد من الناس اللي بيسوقو السيارة ال”سبيشال” دي في امريكا كان بيلعب على جهاز الاندرويد بتاعه او كان لابس نظارة جوجل الجديدة وهو سايق وطلعله تنبيه نكد عليه، شوفو عمل في العربية ايه بسلامته

ليه كده يا بابا، ركّز وانت سايق يا حبيبي

نفسي اعرف جوجل عملت ايه في اللي كان السبب!

“متصفح” ياهو

ياهو اعلنو عن منتج جديد اسمو “اكسيس” (Axis)، وهو المفروض يكون طريقة جديدة تسهل علينا تصفح الانترنت على اكتر من جهاز (موبايل، لابتوب، الخ) مع حفظ النتائج عشان متبدأش من الاول على كل جهاز. الناس بتفكر في راحتك اهو.

الصراحة تقال، البرنامج شكله جميل وتصميمه حلو، وانا جربته على الآيفون والماك والآيباد. استخدامه بسيط وسريع، وبيقضي الغرض اللي معمول علشانه، انه يخلي عملية البحث اكثر فعالية ويسهل ليك انك توصل للنتائج اللي انت بتدور عليها.

السؤال الوحيد اللي معرفتش اجاوب عليه هو لو دي حاجة ممكن استخدمها اصلا بصورة دائمة، حاسس انه ملوش لازمة قوي وصعب انه يلاقي رواج مع الشعب، الناس عاوزة تفتح جوجل وتكتب كلام تقشعر له الابدان وتدوس انتر وخلاص. لكن تعالو نشوف ياهو عاوزاهم يعملو ايه:

ايه رأيكو؟ تنفع ولا دوشة عالفاضي؟ انا حاسس ان ياهو كانو في سبات بقالهم فترة وفي الاخر طلعولنا بحاجة ملهاش لزمة.

- منسي


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044