سامسونج جالاكسي S3: يعيش الكينج!

السلام عليكم ورحمة الله وبركاته،

بعد النجاح الباهر اللي حققته سلسلة الجالاكسي، سامسونج (اكبر مصنّع للموبايلات في العالم) اعلنو الجيل التالت من الموبايل المشهور بتاعهم: Samsung Galaxy S III  في مؤتمرهم اللي اتعمل في لندن بداية الشهر.

الموبايل لسه منزلش الاسواق (حينزل في آخر الصيف على حسب كلامهم)، ولكن احنا جربناه وحبينا نقول لكم رأينا في الجهاز.

ايه الحلاوة دي يا ولاد!

الموبايل شغال على نظام الاندرويد اخر تحديث 4.0.4 المسمّى ايس كريم ساندويتش (ده يعمل احسن شغل في مارينا :) ) وفيه عدة فروق عن الاصدار القديم.

سامسونج عاملة في الموبايل شوية اضافات وحركات جامدة جدا، ولكن قبل ما نبدأ نتكلم عنها تعالو نلقي نظرةٌ سريعةٌ على مواصفات الهاردوير للجهاز.

مواصفات الهاردوير

الشاشة حجمها 4.8 بوصة بوضوح صورة 1280×720، يعني اكبر من الاصدار اللي قبله (جالاكسي S2) اللي كان اصلا كبير. مساحة كبيرة صوابعك تتوه فيها وتدّيلك تجربة رائعة بالذات في تصفح الانترنت والقراءة، واكيد طبعا في الجيمز.

فيه كاميرا خلفية بجودة ٨ ميجابيكسل بتسمحلك تصوّر فيديو هاي ديفينشن (HD) بجودة 1080p،  وكاميرا امامية (لمكالمات الفيديو) بجودة ٢ ميجابيكسل. الكاميرا مزودوش فيها عن الموديل اللي قبله للأسف من ناحية الهاردوير، ولكنهم اضافو مميزات تانية من ناحية السوفت وير زي امكانية انك تاخد صورة من مقطع فيديو، الصور المتتابعة، ومميزات تانية.

معالج السرعة (البروسيسور) يعتبر عملاق، سرعة 1.4Ghz رباعية المحور، ومعاه ميموري داخلي 1GB RAM، يا ماما!

مساحة تخزين ما بين 32GB, 16GB, او 64GB  مع امكانية تزويده بكارت ميموري تاني لغاية 64GB  كمان. يعني ممكن توصل مساحة التخزين في الموبايل ل128GB، حاجة اخر دلع.

وزن الموبايل ١٣٣ جرام ويعتبر خفيف على حجمه. طول x عرض x عمق حوالي 136.6×70.6×80.6 mm

ما بيجيش غير بلونين فقط، ابيض وكحلي. للاسف مفيش بمبي مسخسخ وهو لوني المفضل في الموبايلات :)

يا ابيض يا كحلي، لكن مش رمادي

الحركات

زي ما قلتلكو قبل كدة، سامسونج نزّلو في الموبايل خصاذص مميزة وجامدة جدا، اغلبها مش موجود في اي موبايل تاني.

- اولهم هي خاصيّة Smart Stay (البقاء الذكي؟ هو فيه بقاء غبي؟)، وهي عبارة عن ان الموبايل بيستخدم الكاميرا الأمامية عشان يراقب عينك، ولو اعدت اكتر من ١٥ ثانية عينك مش بتبص عالموبايل يقوم يطفي الشاشة.

- خاصيّة Direct Call، لو انت بتقرأ رسالة ورفعت الموبايل ناحية ودانك يقوم يتصل فورا بالرقم اللي عالشاشة، عشان يوفر عليك المجهود يا حرام :)

- خاصيّة Smart Alert (التنبيه الذكي، تاني؟)، وهي عبارة عن ان لو مسكت الموبايل وكان في حد متصل بيك او باعتلك رسالة وانت مشفتهاش يقوم يهزّ كام مرة عشان ينبهك.

- خاصيّة S Voice، وهو المنافس لSiri  في الآيفون، عبارة عن نظام تلقي اوامر صوتي، عشان تبطل تكتب مسجات وانت سايق، قول للموبايل الرسالة وهو يكتبهالك وحافظ على ارواح الناس في الشوارع.

- خاصيّة Social Tag، بتربط الصور اللي في الموبايل باصدقاءك اللي عالفيسبوك عن طريق الfacial recognition

- خاصيّة Allshare Cast، بتسمحلك انك تعرض كل اللي موجود على شاشة موبايلك على شاشة تلفزيون، او لابتوب، او اي شاشة تانية، وبتسمحلك تستخدم الموبايل كعصاة تحكم لالعاب البلايستيشن.

- ولأول مرة في تاريخ الموبايلات، خاصيّة الشحن الوايرليس!! اشحن موبايلك بدون اسلاك، الموبايل حيتشحن عن طريق حقل مغناطيسي، هالو تومورو (يعني hello tomorrow)

الحاجة الوحيدة اللي ناقصة ان الموبايل يغسل المواعين ويعمل مساج، واتمنى ان سامسونج تفكر جديّاً في الاوبشن ده للاصدار القادم :)

العيوب

الموبايل جبّار مفيش كلام، ولكن اكيد فيه عيوب. العيب الاكبر في رأي هو جودة الصنع. الجهاز مصنوع من البلاستيك وتحسّه صيني شوية، غير لما تمسك مثلا جهاز آيفون ٤ بتحس انك ماسك جهاز عليه القيمة مش حاجة طالعة في علبة كورنفليكس.

للاسف جودة الصنع هي احد اكبر العيوب في اجهزة سامسونج بصفة عامّة. واضح لأن الشركة كورية لسه مش عارفين يفهمو فكرة السوبر لوكس :)

من الآخر

حيفضل الجالاكسي هو الكينج بلا منازع في عالم الاندرويد، لو بتستخدم جهاز اندرويد تاني وشفت ده صدقني حتتحسر على نفسك واحتمال تعيّط شوية كمان. اتفرجي عالفيديو ده، وامسحي دموعك يا آمال :)

- منسي

 


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044