حكاية الفيسبوك.. بالصور

السلام عليكم ورحمة الله وبركاته،

يوم الجمعة ١٨ مايو ٢٠١٢، كان، يوم تاريخي. شركة فيسبوك دخلت فيه سوق البورصة العالمي والشعب اصبح بامكانه يمتلك اسهم في الشركة.

قصة فيسبوك بدأت من ٨ سنين بس، وناس كتير متعرفش الموقع بدأ ازاي ووصل لحجمه انهاردة ازاي. حبينا نكتب مقال فيه اهم النبذات عن حياة الموقع. تعالو نشوف مع بعض ايه هي قصة الفيسبوك.

 البداية البسيطة – ٢٠٠٤

الموقع بدأ بداية بسيطة جدا في سنة ٢٠٠٤ في السكن الجامعي بتاع جامعة هارفارد الامريكية واللي بدأه كان Mark Zuckerberg، احد طلاب الجامعة . وقتها كان موقع صغير جدا والدعم المادي كان قليل قوي. كان الهدف من الموقع انه يكون شبكة اجتماعية تلم طلاب جامعة هارفارد وتوصلهم ببعض. الموقع وفتها كان اسمه TheFacebook. في اكتر من شركة حاولو يشترو الموقع في المرحلة دي زي شركة Friendster وهو كان اكبر موقع اجتماعي في الوقت ده، عرض عليهم ١٠ مليون دولار، واترفض العرض بتاعه.

في فيلم اتعمل سنة ٢٠١٠ عن قصة بداية الموقع اسمه The Social Network، وهو فيلم جامد بيحكي الصعوبات اللي واجهة اصحاب الفكرة في البداية. المرحلة دي كانت مليانة كدب، خداع، تحايل، وخيانة بين كل الاطراف (واولهم Mark Zuckerberg) لما حسو قد ايه الموضوع ممكن يكبر والطمع سيطر عليهم.

عدد المسجلين في الموقع – ديسمبر ٢٠٠٤ :  مليون مستخدم

لفت الانظار – ٢٠٠٥

في سنة ٢٠٠٥ الموقع بدأ يثير اهتمام شركات كبيرة في عالم الاعلان الامريكي، وكلهم حاولو يشترو او يستثمرو قي الموقع وللأسف كل محاولتهم بائت بالفشل. منها عروض من شركات زي NBC, The Washington Post Group وكمان موقع التواصل الاجتماعي MySpace.

السنة دي اتغير فيها اسم الموقع وبقى Facebook بدل TheFacebook، وفتحو ابواب التسجيل لطلاب خارج الجامعات (طلاب المدارس). والشعب اصبح مسموح له يطلع صور عالموقع.

عدد المسجلين في ديسمبر ٢٠٠٥ : ٥،٥ مليون مستخدم

مايكروسوفت وياهو – ٢٠٠٦

الموقع يفتح ابوابه للعالم كله والناس بدأت تتوافد عليه. مايكروسوفت مضت معاهم عقد يسمحلهم انهم يحطو اعلاناتهم عالموقع، وده اثبت جدية الموقع وانه مش بتاع عيال وخلاص. ده كان بداية علاقة مايكروسوفت مع فيسبوك، وهي علاقة طويلة وقوية ما زالت موجودة الى يومنا هذا.

بعد الموضوع ده بشهر، شركة ياهو قدمت عرض لشراء الموقع بمليار دولار (يعني الف مليون) والعرض اترفض.

عدد المسجلين في ديسمبر ٢٠٠٦ : ١٢ مليون مستخدم

الاتحاد – ٢٠٠٧

بعض صفقة الاعلانات اللي مضيتها مايكروسوفت مع الموقع ونجاحها، مايكروسوفت قررت انها تستثمر ٢٤٠ مليون دولار في الموقع وفي المقابل امتلكت نسبة ١.٦٪ من الموقع. ده رفع تقييم السوق للفيسبوك ل١٥ مليار دولار، بعد ٣ سنين من انشائه!!

عدد المسجلين في ديسمبر ٢٠٠٧ : ٥٠ مليون مستخدم

مفيش اسهم  – ٢٠٠٨

كل الناس بدأت تسآل مارك امتى ناوي يخلي شركته تبقى شركة مساهمة ويسمح للناس تشتري اسهم فيها. وكان رده دايما ان الموضوع ده لسه بدري عليه، وانهم مركزين كل جهودهم على تطوير امكانيات الموقع.

دي السنة اللي بدأت فيها خاصية الدردشة عالموقع (الشات)، ودي السنة برضه اللي كانت فيها النكسة الاقتصادية في العالم. انا رأي ان سبب النكسة هو ان الناس بطلت تشتغل وقعدت تدردش، يعني الفيسبوك هو السبب في المصيبة دي :)

عدد المسجلين في ديسمبر ٢٠٠٨ : ١٠٠ مليون مستخدم

فلوس من السماء – ٢٠٠٩

شركات كتير بدأو يستثمرو في الموقع، منهم شركة Digital Sky الروسية اللي استثمرو ٢٠٠ مليون دولار خلتهم يمتلكو ١.٩٦٪ من الموقع.

دي السنة اللي ظهرت فيها خاصية الLike او “اعجبني” اللي قلبت الدنيا.

عدد المسجلين في ديسمبر ٢٠٠٩ : ٣٥٠ مليون مستخدم (زيادة ٣٥٠٪ !!)

قنبلة الخصوصية – ٢٠١٠

مشاكل الخصوصية عن معلومات المسجلين في الموقع بدأت في السنين اللي قبل كده، ولكن في ٢٠١٠ بقت مشكلة كبيرة وقنبلة على وشك الانفجار.

برضه مارك مش عاوز يدي الناس عقاد نافع على موضوع دخول الشركة في البورصة العامة.

فيلم The Social Network اللي اتكلمنا عنه نزل في السينما وكسر الدنيا.

مارك باشا اطلق عليه “رجل العام” من مجلة Time المشهورة.

عدد المسجلين في ديسمبر ٢٠١٠ : ٥٠٠ مليون مستخدم

ارقام خيالية -٢٠١١

استثمارات بحوالي ٥٠٠ مليون دولار تدخل للموقع.

الموقع بدأ يبيع اسهم في اسواق خاصة، وقيمة الموقع ارتفعت ل٥٦ مليار دولار، يعني اكبر من شركة Nike. والتقارير قالت ان الموقع تالت اهم شركة عالانترنت في امريكة.

مارك بدأ يلمح انهم حيدخلو البورصة العامة قريبا، وقيمة الموقع تقدر فوق ال١٠٠ مليار دولار. الناس الفرحة بقت مش سايعاها وكله نزل في الشوارع يغني وقعده يحضنو بعضيهم.

عدد المسجلين في ديسمبر ٢٠١١ : ٧٥٠ مليون مستخدم

الحلم والحقيقة – ٢٠١٢

فييسبوك اشترت شركة Instragram بتاعت الصور بقيمة مليار دولار.

ولكن الاهم ان حلم مارك والعالم اتحقق، شركة فيسبوك دخلت اسواق البورصة العالمية بقيمة فوق ال١٠٥ مليار دولار، وبكدة اصبحت اكبر من ماكدونالدز، وديزني، وفيزا، وفولكس.

عدد المسجلين في ديسمبر ٢٠١٢ : ٩٠٠ مليون مستخدم

موقع انترنت صغير بدأ في غرفة طالب جامعي عنده ٢٠ سنة وقتها، اصبحت شركة قيمتها ١٠٥ مليار دولار بعد ٨ سنين وحجمها اكبر من شركات موجودة من عشرات السنين. مارك زاكربرج عمره انهارده ٢٨ سنة وثروته فوق ال٢٠ مليار دولار.

وتوته توته، فرغة الحدوته. لو حلوا دوس لايك عشان خاطر الفيسبوك :)

- منسي

 


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044