جهاز لوحي… للمتوحشين فقط!

السلام عليكم ورحمة الله وبركاته،

كل من يمتلك جهاز لوحي، زي الآيباد من آبل، او جالاكسي تاب من سامسونج، او اي نوع تاني، بيكون خايف عليه من نسمة الهوا. ولو وقع على الارض قلبه بيقع معاه وبيقعد ساعات متنكد بسبب الموضوع، وممكن يبكي بالدموع كمان.

الاجهزة اللوحية اسوأ ما فيها انها ضعيفة ورقيقة زيادة عن اللزوم، اي خبطة بسيطة ممكن تقسمها نصين او تجيب لها عاهة مستديمة.

في ناس الكلام ده مينفعش معاها، ناس بتاكل الزلط، ناس غاوية عنف واكشن، ناس زي احمد السقا. وعشان الناس دي، اتعمل جهاز الRampage 6، او الغضب السادس. مش الاول او التاني، لأ..السادس. من الأخر، عشان تتخيل مستوى الغضب اللي هو فيه.

الجهاز واخد تصنيف IP7 للحماية ضد التراب والماء والكوارث الطبيعية، وهو اعلى تصنيف في الفئة دي. ممكن توقعه من مسافة ٨ متر على ارض كونكريت من غير ما يحصل له اي حاجة، ممكن تغرقه في البحر، تعرضه لدرجات حرارة فوق ال٥٠، وتعمل فيه بلاوي سوداء تانية كتير زي ما تحب، اطلق لخيالك العنان في التعذيب.

مستحيل تلاقي جهاز تستمتع عليه بلعبة العصافير المعكننة (Angry Birds) اكتر من ده :)

للاسف الجهاز امكانياته الداخلية مش جبارة زي جسمه: شغال على اصدار اندرويد ٢.٣ القديم، شاشة ٥.٧ بوصة، 256MB RAM، 4GB storage، وفيه GPS و كام فتحة USB. امكانيات بدائية جدا مقارنة بباقي الاجهزة اللوحية في السوق.

 Rampage 6 – جهاز للمتوحشين فقط

ولكن اكيد اللي حيشتري الجهاز مش حيكون شاريه عشان احدث مواصفات. يعني مين حيكون عاوز تهمة زي دي إلا مثلا واحد في فرقة كوماندوز، او الراجل اللي بينضف حقول الالغام، او ناس من قبائل متوحشة بيصطادو اسود وسباع. يعني اكيد لو محتاج جهاز بالمنظر ده مش حتفرق معاك ان مش نازل عليه نظام اندرويد ايس كريم ساندويتش :)

ولّا  ايه رأيك؟ مين تاني تفتكر ممكن يحتاج حاجة زي دي؟

- منسي

 

 


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044