الكيبورد الحساس! [فيديو]

السلام عليكم ورحمة الله وبركاته،

يمكن اكبر مشكلة في اجهزة التاتش (اللمس يعني) اللي زي الآيفون والآيباد الخ الخ ان الطباعة على شاشتهم الصغيرة شئ مؤلم ومستفز جدا. الناس عاوزه كيبورد كبير وزرايره جميلة ومريحة عشان تقدر تاخد راحتك وانت بتقطع الدنيا في الشات.

لحل المشكلة دي، اصبح في لوحات مفاتيح كتيرة موجودة في السوق بتشتغل بتقنية البلوتوث عشان تقدر تطبع عليها بدل ما تعل نفسك وانت تحاول تطبع باللمس.

للأسف مشكلة الكيبوردات دي انها طبعا حجمها مش صغير قوي (يعني مينفعش تشيلها في جيبك مثلا) فتلاقي نفسك سايبها في البيت وترجع تاني للتاتش المستفز.

وعشان كدة حبيت اكتب المقال ده واعرفكم بالتقنية الجبارة اللي حتغير حياتكم فورإيفر. تعالو نشوف الفيديو الأول عشان انا عارفكم بتحبو تجيبو من الاخر

طبعا انا في الاول لما شفت الفيديو كنت فاكر ان دي حاجة حتنزل بعدين في المشمش، ولكن اتضح ان التقنية دي موجودة في الاسواق وممكن تشتريها من امازون بسعر ١٧٠ دولار وده ميعتبرش غالي على حاجة مستقبلية بالمنظر ده تقدر تثبت بيها اتخن تخين فيكي يا دنيا التكنولوجيا.

المشكلة الوحيدة من وجهة نظري هو ان الجهاز شكله مش حيعجب الناس اللي بتطبع بسرعة لأن اجهزة الاستشعار حتهيّس. ولكن اكبر ميزة انه صغير وممكن تشيله معاك في كل مكان، وتهبل بيه كل الناس اللي حواليك وتعيش عليهم لما تقول يا بس :)

- منسي

 


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044