السيارة ال…توماتيكي!

السلام عليكم ورحمة الله وبركاته،

كام مرّة اتمنيت لو سيارتك كانت بتمشي لوحدها؟ فاكر لما كنت في السيارة مزنوق في عز الزحمة والحر وقعدت تقول “امتى ربنا يتوب علينا من القرف ده ويعملو سيارة بتسوق نفسها بقى عشان نرتاح”

واخيرا دعواتك استجيبت يا جميل، وكالعادة جوجل تو زا رسكيو! (to the rescue بالبلدي)

انهاردة اطلقت ولاية نيفادا الامريكية صراح اول رخصة من نوعها في امريكا، رخصة لسيارة من تصميم عمّو جوجل..السيارة اللي بتمشي من غير سائق (Driverless Car). وده بجد مش بهزار!

صورة للسيارة التوماتيكي

سيبك ان شكلها عامل زي تلّاجة ايديال زانوسي، ولكن السيارة مبنية على نظام تحكم آلي (ومستقبلي!) بيستخدم الذكاء الاصطناعي، اجهزة الاستشعار، والجي بي اس للتحكم في الفرامل، دواسة البنزين، وعجلة القيادة عشان يسوق السيارة من غير اي تدخل بشري، يعني خليك يا واد ريلاكس وعمّو جوجل حيوصلك :)

في المرحلة دي، السيارة مسموحلها تمشي في شوارع معّينة فقط في نيفادا، وأحد شروط الرخصة ان على الاقل يكون في اتنين ركّاب في السيارة، واحد في كرسي السوّاق عشان يتحكم في السيارة في حالة حصل اي خلل، والتاني في الكرسي اللي جنبه عشان يقعد يتشاهد ويصرخ “حاسب يا مجنون”

السيارة حيكونلها رقم مميز زي اللي موجود في الصورة اللي فوق، عليه علامة انفينيتي، عشان بقية الناس يعرفو ان السيارة دي ملهاش كبير وميهزروش معاها.

اكيد دي الخطوة الاولى في مشوار طويل من الاختبارات والتطوير والتعديل الخ الخ، ولكن في نفس الوقت خطوة تاريخية حتغير مستقبلنا، كفاية انو حييجي اليوم اللي مش حتلاقي حد تشتمو في الزحمة، آخرك حيكون تزعق للراجل اللي في العربية اللي جنبك وتقول: “يا عم ما تلم العربية بتاعتك وشوفها ماشية ازاي ميصحّش كدة” ، يقوم يقولّك: “طب اعمل ايه، دي ماشية توماتيكي والله” :)

- منسي


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044