الساعة الذكية.. اصنعها بنفسك!

السلام عليكم ورحمة الله وبركاته،

موضوعنا انهاردة هو الساعة الذكية. المصطلح ده عامةً بيطلق على اشياء كثيرة لا تمت للزكاء بصلة اصلاً، ولكن في الحالة دي انا اعتبره فيه شيء من الصحة.

الهدف من الساعة هو ان الواحد يعرف الوقت. بس انا بصراحة مش مستعد البس نص كيلو حديد على ايدي طول النهار عشان ابص عليها مرة او اتنين خصوصا ان الموبايل فيه ساعة وانا شايل بدل الموبايل اتنين (وفيه ناس شايلة اكتر بس دول حالتهم مستعصية :) )

كان دايماً حاجة بحلم بيها اني اقدر اعمل حاجات اكتر بالساعة واستفيد بيها، ودورت كتير على آخر ما توصل له العلم في المجال ده ولكن للأسف معظمها لسة في بداية الطريق وقدامها كتير عشان توصل للمستوى اللي المستخدمين نفسهم فيه.

في المقال ده انا حتكلم على احسن ساعة (واقلها تكلفة) وحلخص المزايا والعيوب فيها من وجهة نظري الشخصية. هيا بنا نتعلم سوياً :)

الساعة بيطلق عليها “iPod Nano Watch” والسبب انها في الأصل مش ساعة ولكن اهل الخير قاموا بالواجب. والغريب ان التقنية دي موجودة من سنين ولكنها غير معروفة في البلاد العربية.

الساعة مكونة من جزئين اتنين، اول جزء هو ال”iPod Nano” والجزء التاني هو هيكل ساعة بيسمح انك تركب فيه ال”iPod” والنتيجة بيكون المنظر اللي في الصورة.

الساعة الذكية
صورة الساعة الذكية

انا شخصياً اشتريت الجزئين من Virgin Megastores:

١- iPod Nano 16GB 6th Generation

السعر حوالي ١٧٧ دولار

انا اشتريت اللون الفضي عشان شكله شيك اكتر، ولكن في الوان كتير كلها دلع للي عاوز!

٢- Lunatik TikTok Wristband
 السعر حوالي ٤٦ دولار

انا اشتريت اللون الاسود (عشان لايق مع الفضي) ولكن في تشكيلة كبيرة من شركات كتير بتصنع الهياكل دي من مختلف الخامات؛ زي الحديد والفضة والسيليكون الخ.

المزايا

- الوزن الخفيف جدا، مش زي الساعات الحديد اللي بتخليك مش عارف ترفع دراعك

- امكانيات الآيبود كلها موجودة، ممكن تشغل اي ملف صوتي، تخزن صور، مذكرات صوتية، تسمع راديو وخيارات تانية كتيرة

- تثبيت الناس، طول مانا قاعد العب في الساعة والناس كلها بتبص ومش فاهمة ايه اللي انا باعمله :)

- ارخص من الساعات العادية “الماركات”، لو عايز تشتري ساعة ممّلة وعادية سعرها حيكون اكتر من كدة

- حوالي 17 شكل تختار منهم لبرنامج الساعة عشان متزهقش :)

العيوب

- مش ضد الماء، لازم تكون حذر جدا وانت بتغسل ايدك لأن الماء حيدمر الساعة

- سهل تنكسر لو اتخبطت الشاشاة

- محتاجة شحن كل يومين او اكتر حسب الاستعمال

- امكانيات الآيبود ضعيفة مقارنة بالآيفون، فيه حاجات كتير نتمنى انها تكون موجودة في النانو زي التطبيقات الموجودة على باقي اجهزة آبل ولكن لصغر حجمه مفيش الامكانية دي

من الأخر

الفكرة عجبتني من اول يوم، ومن ساعتها وانا بلبس الساعة على طول. بالنسبة لي المزايا اقوى من العيوب ومجرد الشعور اني ممكن استخدمها في حاجات اكتر بكتير من الساعة العادية بيزيد استعمالي لها. طبعا ده غير ان كل انسان بيشوفني لابسها بيتثبت وبيسألني عنها :)

ايه رأيك؟ قول تعليقك ومتتكسفش.

- منسي


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044