١٠ اسرار في الفيسبوك

السلام عليكم ورحمة الله وبركاته،

الوطن العربي فيه انهاردة حوالي ٤٣ مليون مستخدم للفيسبوك. ما شاء الله، يا رب زيد وبارك. كل ما استخدام الفيسبوك يزيد تقوم الزحمة في الشوارع تقل والناس تقعد في بيوتها.

الفيسبوك عامل زي البحر، مليان سمك اشكال والوان واوبشنز كتيرة قوي. المشكلة ان معظم المستخدمين بيكونو فقط عارفين البدائيات وبيستخدموه بطريقة سطحية، والمشكلة انك اصلا لو حاولت تتوغل وتنتشر وتستمر (ده اعلان بايجون :) ) في الاوبشنز بتاعته حتلاقيها اتغيرت بعد كام الشهر لأنهم كل شوية يغيره الموقع من اوله لأخره، ودي اكتر حاجة مزهقة الناس في حياتها الفيسبوكّية، كل يوم بيصحو الصبح حاطين ايديهم على قلبهم وهما داخلين عالموقع وبيقولو يا رب استر وميكنش اتنسف تاني واحنا نايمين.

ولكن في بعض الاوبشنز والخصائص اللي (الحمد لله) موجودة بقالها فترة ولسه ماتنسفتش. في البوست ده حنشوف مع بعض ايه هما، وازاي ممكن تستخدمهم عشان حياتك عالفيسبوك تبقى سمن على عسل.

حنبدأ من الأسهل للأصعب، عشان اكون في الاول جرجرتك.

١. سينما الجواسيس

طبعا ناس كتير بتحب تدخل على بروفايلات الناس التانية وتقعد بالساعات تقلب في صورهم من باب الفضول و “حب الاطّلاع” (تجسس يعني). الاوبشن ده حيخليك تتمتع اكتر وانت بتتجسس…قصدي وانت بتتفرج على صور الناس.

في البوم الضحية بتاعتك اضغط على اي صورة، وبعد الصورة ما تكبر جيب الماوس عليها، حتقوم تظهر تحتها كلمة “خيارات”، كليك عليها واختار “الدخول الى العرض على الشاشة بكاملها”.

زمان سينما الاطفال، دلوقت سينما الجواسيس

٢. خاصية “بلاش فضايح”

كان زمان ممكن تعمل اي حاجة على الفيسبوك في أمان ومن غير خوف، الله يرحم الايام دي. دلوقت الفيسبوك اصبح مجال الناس تتفضح فيه بسهولة قوي. وطول الوقت بقيت تلاقي الناس بتتنشر على الWall بتاعتهه انهم شافو الفيديو ده وقرأه المقال ده من غير ما الناس تكون عارفه انهم مفضوحين بالشكل ده والWall بتاعهم مليان بلاوي تودي ورا الشمس.

الموضوع ده بيحصل بسبب التطبيقات اللي انت نزلتها على الفيسبوك بتاعك وبتنشر كل حاجة انت عملتها.

ادخل على “اعدادات الحساب” من السهم اللي جنب “الصفحة الرئيسية” فوق على اليمين، وبعدين اختار “التطبيقات” من القائمة اللي عاليمين.

كليك “تعديل” على التطبيق اللي فاضحك ومخلي سيرتك على كل لسان، وبعدين حتلاقي حاجة اسمها “Posts on your behalf”، يعني ينشر بالنيابة عنك، كليك على الصندوق واختار “انا فقط”. كرر ده لكل تطبيق عامل لك مشاكل.

استر على نفسك

٣. خاصية “كفاية دوشة”

الناس عالفيسبوك عندها مئات وآلاف الاصدقاء، الحمد لله كله مشهور اليومين دول، وفوق ده مسجلين في كل صفحة وكل جروب اتعمل في تاريخ الفيسبوك. لما الواحد منهم يدخل عالحساب بتاعه ويبص في الصفحة الرئيسية تلاقي كابوس من دوشة العالم موجوده قدامه تجيب صداع ومستحيل انك تركز على اهتمام معين او معلومات محددة.

في اوبشن في الفيسبوك يسمحلك انك تعمل “قائمة” تحط فيها ناس وصفحات وجروبات معينة، ولما تدخل عالقائمة دي بتشوف بس المعلومات من الناس دي، تقدر تقول عليها فلتر يعني. ممكن تعمل اكتر من واحدة، مثلا: “زمايل العمل”، “الاصحاب”، “الاعداء”، “صفحات تربية الكتاكيت” والخ.

عشان تعمل قائمة جديدة ادخل عالصفحة الرئيسية بتاعتك، ودور عاليمين على كلمة “الاصدقاء” وكليك عليها وبعدين اضغط فوق على زرار “انشاء قائمة“. وبعد ما تضيف فيها الناس والصفحات اللي انت عاوزهم، تقدر تختار انك تشارك القائمة دي مع الشعب او تخليها لنفسك بس.

للناس السبيشال فقط

٤. خاصية “زبطني شكرا”

انا شخصيا من الناس اللي كرهت اليوم اللي قرر فيه الفيسبوك انه يجبر الناس على الانتقال لل”يوميات” او الTimeline. الصفحة الرئيسية كانت زمان واضحة وسهلة ومريحة للعين، دلوقت بقت حاجة تتوه العفريت ومش عارف تبص يمين ولا شمال، وفوق ده كله الفيسبوك بقى هو اللي بيقرر صورك تظهر فين.

بس الحمد لله في طريقة انك تعيد ترتيب العك اللي عملوه، دور على صورة اتحدفت في مكان غلط، اضغط على علامة القلم اللي فوق الصورة، واختار “اعادة ضبط موضع الصورة”، كليك على الصورة واسحبها للمكان اللي عايزها تستقر فيه. زبط البروفايل بتاعك براحتك!

زبطني، شكرا

٥. خاصية التـنـفيض

ساعات كتير بتكون على الشات بتاع الفيسبوك وقاعد تتكلم في امان الله مع الناس اللي بتحبهم وفجأة يطلعلك انسان انت مش طايقه ويعد يرغي ويوجع دماغك. زمان كنت مضطر يا إما تستحمل وعوضك على الله او تقفل الشات كله وتطلع Offline.

دلوقت فيه خاصية بتسمح انك تتجاهل الانسان الغلس بس وتكمل كلامك مع بقيت الناس عادي. لما تختار الاوبشن ده بتظهر عند الغلس اكنك غير متصل ومش موجود اونلاين اصلا.

اضغط على اسم الشخص في الشات، وكليك على الايقونة اللي عاملة زي الوردة (خيارات) واختار “الظهور كغير متصل ل فلان”.

وبكده تكون نفضت للغلسين من غير ما يعرفو وتكمل حياتك السعيدة على الفيسبوك من غير ان منغصات.

ارحمونا بقى

٦. استاذ تاج

اهلاااا بالأستذ  تاج، ده انت واحشنا يا راجل. كل يوم ادخل عالفيسبوك الاقي نفسي معموللي تاج في صور انا مش فيها اصلا، ساعات بتطلع كرسي او تلفزيون او منديل في بدلة فرح.

للأسف الناس فاكرة ان التاج ده (وضع اشارة في الصورة) هو احسن اسلوب تجبر الخلق انهم يشوفو اي صورة تعجبهم، بدل الاستخدام الصح وهو انه يعمل تاج ليك في الصور اللي انت موجود فيها عشان تشوف نفسك في صور الناس التانية.

ولازم كل مرة ادخل اشيل التاج بنفسي، خصوصا ان كل الناس بتشوف انك اتعمللك تاج في صورة جديدة ولما يلاقوها صورة قرد او حاجة غريبة الموضوع بيكون مش ظريف.

دلوقتي في خاصية بتسمحلك انك توافق على اي تاج بيتعملّك قبل ما يتم. اي حد يعملك تاج يقوم يجيلك طلب بالموافقة او الرفض. والتاج ما يظهرش الا لما توافق. واخيرا !!!

ادخل على “خيارات الخصوصية” من السهم اللي جنب “الصفحة الرئيسية”، وبعدين كليك على “الصفحة الشخصية والاشارة” واختار منها “مراجعة المنشورات التي يشير إليك فيها أصدقاؤك قبل ظهورها على صفحتك الشخصية” وخليها “ممكنة” بدل “معطلة”.

مستر تاج

٧. المنفى

ساعات فيه ناس بتستفزك بالحاجت اللي بيكتبوها على صفحاتهم، بوستاتهم ترفع الضغط. دلوقت في خاصية انك تخفي كل البوستات من اشخاص وصفحات معينين.
في الصفحة الرئيسية جيب الماوس على “اخر الاخبار” على يمين الشاشة وكليك على صورة القلم اللي بيظهر واختار “تعديل الاعدادات”. من هناك ممكن تخفي منشورات من اي حد وتنفيهم من صفحتك.

نفسن براحتك

٨. الصور الملعلعة

للأسف لما تيجي تضيف صورة لالبوم في الفيسبوك بيدمر الجودة بتاعتها لأنه مش بيطلعها HD. لو عندك صورة عزيزة (هي عزيزة عارفة ان عندك صورتها؟) وعاوز تحافظ على جودتها اختار “عالية الجودة” لما تيجي تحمّل الصورة. بتاخد وقت اطول، لكن لو صورة عزيزة يبقى بلاش نزعلها.

هي دي عزيزة؟

٩. سيكريت للغاية

نفسك تبقى عضو في جروب سرّي مليان اسرار ومحاط بجو من السرية وتسميه “سيكريت للغاية” ؟ واي نوت، وليه لأ. ممكن دلوقت تنشئ جروب سري وتختار مين الناس اللي مسمحلوهم يشوفو ويشاركو فيه.

اضغط على “المجموعات” في الصفحة الرئيسية (على اليمين) وكليك على زرار “انشئ مجموعة”، اختار اسم الجروب ومين الناس المعزومة فيه واختار “سرية”. اهلا بيك في عالم السيكريتس.

عالم السيكريتس

١٠. الخاصية اكس

آخر خاصية هي يمكن اهم واقوى خاصية موجودة في الفيسبوك انهاردة ومحدش عارف عنها. انا نفسي اتكلم عنها..ولكن للأسف دي سيكريت هي كمان :)

- منسي


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044