احترف النوم!

السلام عليكم ورحمة الله وبركاته،

نفسك تنام كويس بس مش عارف؟ حاسس دايما انك مرهق وتعبان؟ بتصحى الصبح وانت مش شبعان نوم حتى بعد ٦ او ٨ ساعات؟ نفسك تبقى محترف في النوم وتدخل دوري ابطال اوروبا؟

دونت ووري، انت مش لوحدك. ملايين الناس بتعاني من مشاكل جامدة في النوم. واكترهم طلاب، طول الليل سهرانين بي….. بيذاكرو (معلش عدّيها).

مشاكل النوم بتؤدي لمشاكل في الشغل والجامعة والحياة الشخصية وفقدان في التركيز وبلاوي زرقاء كتير قوي.

اتنين طلّاب هندسة من جامعة نيويورك كانو بيعانو من نفس المشكلة (دول بيذاكرو بجد)، وقررو انهم يراقبو نمط النوم بتعاهم عشان يكتشفوا ايه المشكلة وازاي ممكن يعالجوها.

ومن هنا اتولد برنامج SleepBot المجاني (فِري) على اجهزة الاندرويد.

البرنامج بيسمح للمستخدم انه يراقب الاوقات اللي بيدخل ينام فيها واللي بيصحا فيها عن طريق لمسة زر فقط. وبيديك نصائح لتحسين انماط نومك عن طريق المعلومات دي. وبيسمحلك انك تشوف احصئيات من بقية مستخدمي البرنامج. وممكن تضيف ملاحظات تفكرك بحالة معينة انت كنت فيها قبل ما تنام وممكن كانت هي تسببت لك في أرق او نوم متقطع.

وفي اي وقت البرنامج ممكن ينتج تقرير يبين نمط النوم بتاعك على فترة زمنية محددة مع الملاحظات لكل ليلة، وبكدة تقدر تعرف ايه مشاكل النوم عندك وتكتشف ايه تأثيرها على حياتك اليومية.

البرنامج بيستخدم الانترنت وبيشارك معلوماتك مع كل الناس (والعكس صحيح). وهنا قوة البرنامج، ان لو انت عندك مشكلة في النوم لسبب معين اكيد في حد تاني في الدنيا عنده نفس المشكلة، وعن طريق مشاركة البيانات ما بين جميع المستخدمين بيلاقو الحلول لمشاكل نومهم بشكل اسرع واسهل.

دلوقت البرنامج متوفر فقط لآندرويد. ولكن اصدار الآيفون جاي في السكّة.

- منسي


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044