اجمل ترحيب!

السلام عليكم ورحمة اله وبركاته،

معظم الناس بتكون قلقانة في اول يوم ليها في اي وظيفة جديدة. طبعا الواحد بيكون داخل مكان جديد، فيه ناس جديدة، ومش عارف سنينه فيه حتكون سوده ولا بيضة.

معظم الشركات الكبيرة بتبعت رسالة لبقيت الموظفين بترحب فيها بالموظف الجديد، عشان تخف عنده الرهبه دي، ويبدأ يشوف شغله بسرعة وميضيعش وقت :)

شركة Apple، اللي تعتبر اغنى شركة في العالم بسيولة تقدر بحوالي ٤٧٠ مليار دولار، عندها تقليد مختلف شوية. لما ينضملها موظف جديد اكيد بيكون طاير من الفرحة في اول يوم له وهو بيبدأ مشواره مع شركة غيرت التاريخ وكتبت اسمها فيه بحروف من جليتر (Glitter)، ولكنهم بيبعتولو رسالة ترحيب شخصية ومطبوعة كمان. واحد من الموظفين الجداد في الشركة واضح ان الفرحة مش سايعاه وحب يوّري الناس الرسالة دي واحتمال يكون وزع ملبس وكيتكات عليهم كمان :)

كلام من دهب

ودي ترجمة الرسالة بالبلدي:

“في نوعين من الشغل: في الشغل عادي، وفي شغل حياتك. النوع اللي عليه بصماتك من اوله لاخره، النوع اللي مستحيل تتهوان فيه، النوع اللي مستعد تضحي علشانه. هو ده الشغل اللي ممكن تعمله في آبل. الناس مبتجيش هنا عشان تشتغل شغل روتيني، الناس بتيجي هنا عشان تغير العالم. عاوزين شغلهم يترجم لحاجة، حاجة كبيرة، حاجة مستحيل تحصل في اي مكان تاني.

اهلا بيك في آبل”

يا سلام، ايه الكلام الجميل ده. حاجة تفرح والله، وتفتح نفس الواحد عالشغل من كل قلبه. طبيعي ان الشركة غيرت العالم بمنتجاتها.

- منسي


Fatal error: Uncaught Exception: 12: REST API is deprecated for versions v2.1 and higher (12) thrown in /home/taqneya/public_html/wp-content/plugins/seo-facebook-comments/facebook/base_facebook.php on line 1044